उरण | पिरवाडी समुद्रात अडकले चार तरुण! सागर रक्षक दलाचे बचावकार्य

 

 

उरण | तालुक्यातील पिरवाडी समुद्रकिनार्‍यावर सुट्टीच्या पार्श्वभूमीवर पर्यटकांची मोठी गर्दी होत आहे. उन्हाच्या काहिलीपासून दिलासा मिळवण्यासाठी आणि समुद्राच्या लाटांचा आनंद घेण्यासाठी मोठ्या संख्येने पर्यटक या ठिकाणी दाखल होत आहेत. मात्र या आनंदमयी वातावरणात रविवारी (१३ एप्रिल) एक थरारक घटना घडली.

 

नागाव-पिरवाडी किनारपट्टीजवळील समुद्राच्या मध्यभागी चार तरुण भरतीच्या पाण्यात अडकले. समुद्रात फिरण्यासाठी गेलेल्या या तरुणांना भरती सुरू झाल्याने परत येणे अशक्य झाले. पाण्याचा वेग आणि खडकाळ रचना यामुळे त्यांच्या जीवाला धोका निर्माण झाला होता. सुदैवाने, घटनास्थळी उपस्थित असलेल्या लोकांनी वेळेत सागर रक्षक दलाला माहिती दिली. घटनेची गंभीरता लक्षात घेऊन सागर रक्षक दलाने तत्काळ बोट घेऊन समुद्रात प्रवेश केला.

 

त्यावेळी समुद्रात उधाण होते, लाटा जोरात धडकत होत्या आणि संपूर्ण परिसर खडकाळ असल्यामुळे मदतकार्य करणे अत्यंत धोकादायक होते; पण दलातील पवार आणि मिसाळ या अधिकार्‍यांनी जीवाची पर्वा न करता बचावकार्य सुरू केले. त्यांच्या मदतीला दलाचे सदस्य योगेश काठे, नौशाद कुरेशी, संतोष कडू आणि अकबर कुरेशी यांनीही तत्परता दाखवली. या सर्वांनी समन्वयाने काम करत समुद्राच्या मध्यभागी अडकलेल्या चार तरुणांना सुरक्षित किनार्‍यावर आणले.

 

शैलेश काटे (वय २२), सुमेध मिश्रा (वय २४), सागर नावणे (वय २४) आणि सुमेध अवस्कर (वय २२) अशी बचावलेल्या तरुणांची नावे असून हे सर्वजण ऐरोली, नवी मुंबई येथील रहिवासी आहेत. या घटनेनंतर स्थानिक प्रशासन आणि सागर रक्षक दलाने पर्यटकांना समुद्रात उतरताना काळजी घेण्याचे आणि अधिकृत मार्गदर्शनाशिवाय खोल समुद्रात जाणे टाळण्याचे आवाहन केले आहे.