कानसई येथे महापारेषणच्या सबस्टेशनमध्ये अग्नितांडव , आग विझवण्यात यश; मोठे नुकसान

 

 

नागोठणे | रोहा तालुक्यातील नागोठणेजवळ असलेल्या ऐनघर ग्रामपंचायत हद्दीमधील कानसई येथील महापारेषणच्या ४०० केव्ही क्षमता असलेल्या सबस्टेशनमध्ये बुधवारी (२ एप्रिल) रोजी दुपारी १२ वाजण्याच्या सुमारास स्फोट होऊन भीषण आग लागली. यावेळी येथे बाजूला असलेल्या ऑईलमुळे काही क्षणातच आगीने रौद्र रुप धारण केले. त्यामुळे सबस्टेशनमध्ये अग्नितांडव पहावयास मिळाले.

 

अग्निशमन दलाच्या जवानांनी ही आग आटोक्यात आणली. मात्र या दुर्घटनेत मोठे नुकसान झाले आहे. आग लागल्यानंतर सबस्टेशनच्या समोरच असलेल्या प्राथमिक शाळेच्या आसपास स्फोट झाल्यामुळे स्फोटातील काही जळाऊ आगीचे गोळे शाळेच्या परिसरात उडून आले.शाळेच्या भोवती सुकलेले गवत असल्यामुळे ही आग पसरत गेली. शाळेमध्ये पेपर सुरु असतांनाच ही आग पसरत गेल्यामुळे विद्यार्थ्यांमध्ये भितीचे वातावरण पसरले व सर्वांची तारांबळ उडाली.

 

यावेळी येथील स्थानिक नागरिकांनी लगेचच त्या ठिकाणी धाव आग आटोक्यात आणण्यासाठी प्रयत्न केले. तातडीने जिंदाल कंपनीच्या अग्निशमन दलाला पाचारण करण्यात आले. अग्निशमन दलाचे जवान प्रज्वल सकपाळ व अच्युतानंद तसेच त्यांच्या सहकार्‍यांनी घटनास्थळी धाव घेत शर्थीचे प्रयत्न करीत आग आटोक्यात आणली.

 

या आगीत सबस्टेशनचे मोठ्या प्रमाणात नुकसान झाले असल्याचा प्राथमिक अंदाज आहे. दरम्यान, कानसई येथील सबस्टेशनमध्ये वारंवार आग लागण्याच्या घटना घडत असल्याने, याबाबत योग्य त्या उपाययोजना करण्यात याव्यात अशी मागणी येथील स्थानिक नागरिकांनी केली आहे.