मुंबई टू गोवा रो-रो सेवा सुरु होणार ; सहा तासांचा होणार सुपरफास्ट, आनंददायी प्रवास

 

मुंबई | मुंबई गोवा मार्गावर लवकरच रो रो बोट सेवा सुरु होणार आहे. त्यामुळे प्रवाशांना समुद्रमार्गे मुंबई ते गोवा असा प्रवास अनुभवता येणार आहे. सहा तासांचा हा प्रवास असणार आहे. या बोटीतून एकाच वेळी ६२० प्रवासी आणि ६० वाहने वाहुन नेण्याची क्षमता असणार आहे. मुंबई ते गोवा हे अंतर ५८९ किमी इतके आहे.

 

मुंबई ते गोवा या प्रवासाठी सध्या वाहतुकीचे दोन पर्याय आहेत. एक म्हणजे कोकण रेल्वे आणि दुसरा म्हणजे मुंबई गोवा महामार्ग. मुंबई गोवा महामार्गे प्रवासासाठी १० ते १२ तास लागतात. तर, रेल्वेने गेल्यास प्रवासासाठी ८ ते ९ तासांचा वेळ लागतो. मात्र, आता समुद्र मार्गे हाच मुंबई गोवा प्रवास फक्त ६ तासांत शक्य होणार आहे.

 

जलवाहतूक सेवा देणार्‍या एका खाजगी कंपनीच्या माध्यमातून मुंबई ते गोवा अशी रो रो बोट सेवा सुरु केली जाणार आहे. प्रवासी जहाजाच्या माध्यमातून प्रवाशांन मुंबई गोवा प्रवास करता येणार आहे. गोव्याला जाणारे हे खाजगी जहाज मुंबईतून निघेल. मुंबईतील माजगाव ते गोव्यातील मुरगाव दरम्यान अशी ही रो रो फेरी असेल. मुंबई - गोवा रो रो ची ट्रायल रन झाली असल्याची माहिती समोर येत आहे.

 

अंतिम मंजुरी मिळाल्या नंतर माझगाव डॉक ते पणजी जेट्टी डॉक पर्यंत फेरी सेवा सुरू होईल. एप्रिल अखेरीस किंवा मे महिन्याच्या सुरुवातील ही वाहतूक सुरु होऊ शकते. या रो रो सेवेमुळे महाराष्ट्र आणि गोवा दोन्ही राज्यांच्या पर्यटनासाठी फायदा होणार आहे. परिवहन मंत्री प्रताप सरनाईक ही रो रो सेवा सुरु करण्याच्या अनुषंगाने प्रयत्नशील आहेत.