माथेरानच्या राणीचा वेग वाढणार ? रेल्वे बोर्डाच्या निर्णयाची प्रतीक्षा,फेर्‍यांमध्येही होणार वाढ

 

 

कर्जत | माथेरानच्या राणीची सफर माथेरानला येणार्‍या प्रत्येक पर्यटकाचे स्वप्न असते; परंतू अनेकांना ही सफर करता येत नाही. पर्यटकांची गरज लक्षात घेऊन लवकरच या मार्गावरील रेल्वेची गती आणि फेर्‍यांमध्ये वाढ होण्याची शक्यता आहे. याबाबतची सर्व तयारी झाली असून रेल्वे बोर्डाच्या निर्णयाची प्रतीक्षा असल्याचे समजते.

 

मध्य रेल्वे प्रशासनाने नेरळ माथेरान नेरळ मार्गावर रुळ बदलणे, स्लीपर बदलणे आदी कामे पूर्ण केली आहेत. मिनीट्रेनच्या नॅरोगेज मार्गावर गती वाढविण्यासाठी आवश्यक बदल झाले असून त्यादृष्टीने या मार्गावर रेल बोर्डाकडून ट्रायल घेण्यात आल्या आहेत. त्यामुळे आगामी काळात नेरळ-माथेरान-नेरळ मार्गावर गाड्यांची संख्या वाढणार आहे. नेरळ माथेरान नेरळ मार्गावर मिनी ट्रेनची गती सध्या १० ते १२ किमी प्रति तास अशी असून ही गती १८ किमी प्रति तास होण्याची शक्यता आहे.

 

मिनीट्रेनची गती वाढावी, यासाठी गेली तीन वर्षे नेरळ माथेरान या २१ किलोमिटर लांबीच्या मार्गावरील रुळाखाली असलेले ३७५०० स्लीपर बदलण्यात आले आहेत. त्याचवेळी बहुतांश ठिकाणी पाणी वाहून जाण्यासाठी लहान मोर्‍या बनविण्यात आल्या आहेत तर काही पाईप टाकून आणि दरडप्रवण क्षेत्र असलेल्या ठिकाणी गॅबियन वॉल बनविण्यात आल्या आहेत.तर नॅरोगेज मार्गाच्या बाजूला पावसाळ्यात पाणी वाहून जाण्यासाठी गटारे बनविण्यात आली आहेत.

 

या सर्व प्रकारामुळे नेरळ माथेरान नेरळ मिनीट्रेनचा मार्ग सुरक्षित करण्यात आला आहे. आता त्याच नेरळ माथेरान मार्गावरील चालविण्यात येणार्‍या मिनीट्रेन यांची संख्या वाढविण्यासाठी आवश्यक असलेल्या चाचण्या रेल्वे बोर्डाकडून घेण्यात आल्या आहेत.

गाडीला लावण्यात आलेल्या इंजिनांचा वेग पहिल्या दिवशी १४ किमी प्रति तास तर दुसर्‍या दिवशी १६ किमी प्रति तास आणि तिसर्‍या दिवशी गा वेग ताशी १८ ठेवून गाडी चालविण्यात आली. या तिन्ही दिवसांचे चाचण्या यशस्वी झाल्या असून त्यानंतर सुरक्षा आयुक्तालय लखनौ यांच्याकडून तीन डब्यांमध्ये प्रवासी बसल्यानंतर गाडीचा वेग तपासण्याचा प्रयत्न केला. त्यात तीन डब्ब्यातील प्रवासी यांच्या वजनाचे लोखंड साहित्य त्यात ठेवण्यात आले आणि गाडीची चाचणी घेण्यात आली.

नेरळ माथेरान नेरळ मिनीट्रेन यांचा गाडीचा वेग कमी असल्याने नेरळ माथेरान मार्गावर सध्या केवळ दोनच गाड्या चालविल्या जातात. त्या गाड्यांची संख्या वाढविण्यासाठी रेल बोर्डाने पुढाकार घेतला असून गाड्या वाढविण्यासाठी मागील काही दिवसांपूर्वी घेण्यात आलेली चाचणी महत्वाची ठरणार आहे. त्यामुळे नेरळ माथेरान नेरळ मार्गावर मिनी ट्रेनची संख्या वाढविण्यासाठी महत्वाची ठरणार आहे.

गेल्या काही वर्षापासून नेरळ माथेरान नेरळ या मार्गावर चालविण्यात येणारी मिनीट्रेनची तिकीट ऑनलाईन पद्धतीने काढता येत नाही. नेरळ आणि माथेरान येथे मिनीट्रेन सुटण्यापूर्वी एक तास आधी तिकीट खिडकी खुली केली जाते. त्यामुळे अनेक पर्यटक प्रवाशांना तिकीट मिळत नाही आणि त्यामुळे ऑनलाईन तिकीट खिडकी पुन्हा सुरू करावी अशी मागणी पर्यटकांकडून केली जाते.